Izan Hadi Ur
Begira hago, euriari begira aterpetik. Uraren doinu
monotonoak inguratzen hau, geldo, luzaroan. Sabaian zalaparta bustia eten gabe
ari duk erritmo biziari eutsiz eta erauntsiaren atsedenaldi bat heldutakoan,
oraindik ere, iturri hotsak zoruan sortutako putzuraino zirauk. Teilaren sabel
gorri borobiletik barrena ur jarioa astrapalaka zoak. Zaparradaren baretzeaz
bat putzuan euri tantek, orain pausuan, uhin borobil ozen bilakatzen ditek goitik
beherako abiada.
Begira iezaiok tanto lodi horri, nola luzatzen den teilaren
hegalpetik askatu nahirik. Azkenik euri tantaren buztana soltatzen duk sabel
gorritik eta izaki borobil gardena libro zihoak bere buruaren jabe. Aske eta
gazte, ez duk jabetzen grabitateak fatidikoki ezartzen dion patuaz, bost metro
eta pikuko hegaldiak dirauen arteko izana daukala, edo bostehun eta hogei
zentimetrokoak, edo bost mila eta berrehun milimetrokoak, edo … Nahi adina
luzatu arren, tangada jaioberriaren azkena ziur gerturatuko duk potxingoko
urarekin bat egin arte, tanta aske burujabea izateari utziz.
Ziklo borobil bikainean heldu duk hodeietatik datorren ale
dizdizaria. Eta haietara itsasotik lurrunduta igoa duk lehenago. Itsasoa duk,
berriz, azkenik, tanta xumearen jomuga, ibilbidea osatuz.
Bitartean, egun arre euritsu honetan ere, kolore guztiak
zurrupatzen ditik tantoaren azal borobilduak, hodei sabel erraustuen artetik
ageri den zertzelada urdina eta ahulduta eta zeharka datozen izpi bakanak.
Alboko landako berde eta horiak eta teilaren gorria ere, denak nahasian
islatzen dituk ur perla txikian.
Hire burua urmaelera eroriz doan tanta dizdizari irudikatzen
duk, sabel gorriak erditu hinduenetik urak berdinduko hauen orenera. Lege
fisiko eta kimikoek mugatzen haute heure denboraren izate osoan. Ura haiz
ehuneko 70ean. Gainerako 30a ere, egunen batean erre hazatenean,
uretan disolbatuko duk aurrerago edo atzerago, itsaso zabalean nahiz lur
bedeinkatupean.
Jaiotze aurretiko bizitzan urez inguraturik hengoen, likido amniotikoan. Likido hau itsas uraren ia berdina omen duk.
Ez haiz desagertuko, orain itsaso, orain hodei, orain erreka
izango haiz gurpil amaigabean. Be water my friend. Izan hadi ur.
No hay comentarios:
Publicar un comentario